Сургуулийн сурагч нулимс асгаруулагч, амьсгал боогдуулагч цацсан байж болзошгүй нөхцөл байдал тогтоогджээ

2022-11-08 13:36:00

Дархан-Уул аймгийн Оюуны ирээдүй цогцолбор сургуульд өнөөдөр 11 цагийн үед хүүхдүүд гаазнаас хордсон гэх дуудлага мэдээлэл бүртгэгдсэн байна. 

ЭМЯ-наас өгсөн мэдээллээр Дархан-Уул аймгийн Оюуны ирээдүй цогцолбор сургуулийн 31 хүүхэд, 6 том хүн эмнэлэгт хэвтсэн байна. Хоёр том хүн эрчимт тасагт, нэг нь ухаан балартсан ярьж чадахгүй байдалтай, нөгөө нь мөчид татаад байна толгой хүчтэй өвдөөд байна гэсэн байдалтай. 31 хүүхдэд эмчилгээ хийж байна. Бүх хүнд хоолой хорсох, толгой өвдөх зовиуртай байна гэлээ. 

Дархан-Уул аймгийн Засаг даргын орлогч Б.Жавхлан “Их завсарлагааны үеэр мэргэжлийн байгууллагуудад дуудлага мэдээлэл ирсэн байна. Ахуйн гааз байж болзошгүй гэдэг мэдээлэл ирээд цагдаа, тагнуул гээд мэргэжлийн байгууллагууд ажиллахад урьдчилсан байдлаар ахуйн гааз биш гэдэг нь тогтоогдсон байна. Тухайн сургуулийн сурагч нулимс асгаруулагч, амьсгал боогдуулагч цацсан байж болзошгүй нөхцөл байдал тогтоогдсон гэв. Хэргийг үргэлжлүүлэн шалгаж байгаа юм байна” гэв.