БНСУ-д барилгын нурангид дарагдсан Монгол иргэний нэг нь ухаан орохгүй байгаа гэв

2022-11-29 10:18:00

БНСУ-д ажиллаж байсан хоёр монгол иргэн барилгын нурангид дарагдсан гэх мэдээлэл гараад байгаа юм. Үүнтэй холбоотойгоор Гадаад харилцааны яамнаас албан ёсны тайлбар гаргасан байна. 

Уг тайлбарт  "БНСУ-ын Умард Кёнсан мужийн Сонжу хотод барилга дээр ажиллаж байсан хоёр монгол иргэн барилгын нурангид дарагдаж хүнд бэртсэн. Осолд өртсөн иргэдийн нэгнийх нь биеийн байдал хэвийн, нөгөө иргэний биеийн байдал хүнд, ухаан орохгүй байгаа тул Кёнгбук Их сургуулийн эмнэлэг рүү шилжүүлээд байна. Тус иргэд нас барсан гэдэг нь худал ташаа мэдээлэл бөгөөд Сөүл дэх Элчин сайдын яамны Консулын хэлтэс болон Пусан дахь Консулын газраас осолд өртсөн иргэд болон ар гэрийнхэнд нь шаардлагатай туслалцааг үзүүлж байна" гэжээ.