Хөгжлийн банкны сонсголд Х.Баттулга, Ц.Элбэгдорж, С.Баярцогт нарын 210 хүнийг гэрчээр дуудна

2023-03-06 12:04:00

Гуравдугаар сарын 13-17-ны өдрүүдэд болох,Хөгжлийн банкны эх үүсвэрээс арилжааны банкаар дамжуулан олгосон төсөл, хөтөлбөрийн зээлийн ашиглалт, зарцуулалт, үр дүн /2542 төсөл/, Хөгжлийн банкны бусдаас татан төвлөрүүлсэн хөрөнгийн удирдлага, үр дүнгийн талаар нотлох баримтыг шинжлэн судлах сонсгол болно. Уг асуудлаар Хөгжлийн банкны асуудлыг хянан шалгах түр хорооны дарга, УИХ-ын гишүүн Б.Энхбаяр өнөөдөр мэдээлэл хийлээ. 

Тэрбээр, "Энэ удаагийн сонсголоор хоёр үндсэн асуудлыг хэлэлцэнэ. Нэгдүгээрт, Хөгжлийн банкны эх үүсвэртэй арилжааны банкуудаар олгосон 2542 зээлийн асуудал. Нийт 1.6 их наяд төгрөгийн зээлийн асуудал яригдана. Хоёрдугаарт, 2011-2020 он хүртэлх хугацаанд арилжааны банкуудад Хөгжлийн банкны эх үүсвэрээс байршуулсан нийт дүнгээр 3280 ш мөнгөн хадгаламжийн хэлцэлд дүн шинжилгээ хийсэн. Үүнтэй холбогдуулан мөнгөн удирдлагын асуудлыг ярина" гэв.

Гурав дахь удаагийн нээлттэй сонсголд 210 албан тушаалтныг гэрчээр дуудах юм байна.

Үүнд Ерөнхийлөгч асан Х.Баттулга, Ц.Элбэгдорж, Сангийн сайд асан С.Баярцогт, Ч.Хүрэлбаатар, МCS группийн үүсгэн байгуулагч Ж.Оджаргал, Таванбогд трейдийн үүсгэн байгуулагч Ц.Баатарсайхан, Буян компанийн үүсгэн байгуулагч Б.Жаргалсайхан, УИХ-ын гишүүн асан Ж.Батзандан, Л.Эрдэнэчимэг, УИХ-ын гишүүн О.Цогтгэрэл, Ш.Адьшаа нарын 210 хүнийг гэрчээр дуудна.