С.Батдөлийг үргэлжлүүлэн нэг сарын хугацаатай цагдан хорихоор шийдвэрлэжээ

2023-03-10 10:36:00

Гэрээс нь болон хамаарал бүхий объектоос 7.3 тэрбум төгрөг олдсон С.Батдөлд авсан цагдан хорих таслан сэргийлэх арга хэмжээг дахин нэг сараар сунгажээ.

УБТЗ-ын Тээвэр зохион байгуулалтын албаны орлогч дарга С.Батдөлийг анх 2023 оны нэгдүгээр сарын 6-ны өдөр саатуулж, сулласан ч гурав хоногийн дараа сарын хугацаатай хорих шийдвэр гарсан. Дахин цагдан хорих таслан сэргийлэх арга хэмжээний хугацаа сунгуулах тухай хоёрдугаар сарын 6-ны өдөр ирүүлсэн саналыг хэлэлцээд 8-нд хорих хугацааг дахин сунгасан юм. 

Нийслэлийн Прокурорын газрын хяналтын прокуророос яллагдагч С.Батдөлд авсан "Цагдан хорих" таслан сэргийлэх арга хэмжээний хугацаа сунгуулах тухай санал ирүүлжээ. Саналыг Баянгол дүүргийн Эрүүгийн хэргийн анхан шатны шүүх 2023 оны гуравдугаар сарын 07-ны өдөр прокурор, яллагдагч, түүний өмгөөлөгч нарыг оролцуулан хянан хэлэлцээд Эрүүгийн хэрэг хянан шийдвэрлэх тухай хуулийн 14.10 дугаар зүйлийн 2 дахь хэсэгт "Хэргийн ээдрээ төвөгтэй байдлыг харгалзан яллагдагчийг цаашид цагдан хорих ..." гэсэн заалтыг үндэслэн яллагдагч С.Батдөлд авсан "Цагдан хорих" таслан сэргийлэх арга хэмжээний хугацааг нэг сарын хугацаагаар сунгаж шийдвэрлэсэн байна.