Цасан шуурганы улмаас төөрсөн иргэнийг эрэн хайх ажиллагаа үргэлжилж байна

2023-03-15 10:12:00

Зүүн аймгуудын нутгаар өчигдөр буюу 14-нд орсон цасан шуурганы улмаас Сүхбаатар аймгийн Онгон, Халзан суманд иргэн төөрсөн, сураггүй болсон хоёр удаагийн дуудлага бүртгэгдэж, нэг иргэнийг эсэн мэнд олж, Халзан суманд төөрсөн иргэнийг эрэн хайх ажиллагаа үргэлжилж байна.

Мөн Хэнтий аймгийн Баянхутаг, Хэрлэн сумын нутаг дэвсгэрт автомашин цасанд суусан 4 удаагийн дуудлагын дагуу аймгийн Онцгой байдлын газрын алба хаагчид үүрэг гүйцэтгэн, автомашинуудыг татан гаргалаа.

Цаг уурын байгууллагын ирүүлсэн мэдээгээр өнөөдөр уулархаг нутгаар цас орж, явган шуурга шуурч, говь, тал, хээрийн нутгаар салхи, шуургатай байх тул иргэд, малчид, тээвэрчид та бүхэн онцын шаардлагагүй тохиолдолд хол, ойрын замд гарахгүй байхыг анхааруулж байна.

Эх сурвалж: ОБЕГ