Т.БАЯРХҮҮ: Он гарснаас хойш гамшиг ослын улсмаас 80 хүн амиа алдаж 54 хүн бэртсэн

2025-05-07 13:24:00

Улсын онцгой комиссоос гамшиг осол, хээрийн түймрийн нөхцөл байдлын ээлжит мэдээллийг УОК-ын нарийн бичгийн дарга Т.Баярхүү өглөө.

"Он гарснаас 2155 удаагийн гамшиг, аюулт үзэгдэл, ослын дуудлага бүртгэгдэж үүний улмаас 80 хүн амиа алдаж, 54 хүн гэмтэж урьдчилсан байдлаар 23.7 тэрбум төгрөгийн бодит хохирол учраад байна.

Аюулт үзэгдэл, гамшгийн хор уршгийг арилгахад онцгой байдлын байгууллагаас давхардсан тоогоор 17545 аврагч, 3898 техник хэрэгсэлтэйгээр ажиллаж, 760 гаруй хүний амь насыг авран хамгаалж, тусламж үйлчилгээ үзүүлсэн. Мөн 184 тэрбум төгрөгийн хохирлоос урьдчилан сэргийлж ажилласан гэсэн мэдээлэл байна. Ослын тохиолдын дийлэнх хувийг гал түймрийн дуудлага эзэлж байна.

Нийт 1859 удаагийн гал түймрийн тохиолдол бүртгэгдсэнээс 1774 нь обьект, 85 нь ой хээрийн түймэр байна.

Газар хөдлөлт 25 удаа бүртгэгдсэн.Одоогоор сургуулийн дээвэр, байшингийн хана, тааз цуурсан гэдгээс өөр бодит хохирол учраагүй. Ус цаг уурын нөхцөл байдлаас шалтгаалсан гамшигт үзэгдэл гэвэл зам даваа хаагдаж, цасанд боогдох гэх мэт 38 дуудлага бүртгэгдсэн. Хүний үйл ажиллагаанаас хамааралтай 220 дуудлага бүртгэгджээ. Мал амьтны гоц халдварт өвчин 13 бүртгэгдсэн. Өнгөрсөн оны мөн үетэй харьцуулахад 6.8 хувиар бүртгэгдсэн тохиолдол өссөн байна.

Бүртгэгдэж байгаа ой хээрийн түймэр, гал түймрээс урьдчилан сэргийлэх мэдээллийг албаны эх сурвалжаас авах нь зүйтэй. Өнөөдрийн байдлаар хээрийн хоёр түймэр асч байна. Аймаг, сумын мэргэжлийн ангийнхан, иргэд унтраах үйлү ажиллагааг зохион байгуулж байна.