Нийслэлийн боловсролын газраас замын түгжрэлийг бууруулахын тулд 59 сургуулийн цагийн хуваарьт өөрчлөлт оруулах санал гаргажээ

2022-02-14 11:49:00

Бүх шатны боловсролын байгууллагууд өнөөдрөөс танхимаар хичээллэж эхэлж байна. Үүнтэй холбоотойгоор замын хөдөлгөөний ачаалал ч нэмэгдсэн талаар Тээврийн цагдаагийн албанаас мэдээллээ.

Ялангуяа Яармагийн баруунаас зүүн чиглэлд, Нарны зам, Энх тайваны өргөн чөлөө буюу Таван шараас Баруун дөрвөн зам гээд бараг бүх зам өндөр ачаалалтай байна.

Тэгвэл замын түгжрэлтэй холбоотойгоор хотын А зэрэглэлийн бүсэд байршилтай сургуулиудын цагийн хуваарийг зохицуулах боломжтой гэсэн судалгааг Нийслэлийн боловсролын газраас гаргажээ.

Энэ талаар Боловсролын ерөнхий газрын дарга Т.Ням-Очир өнөөдөр мэдээлэл хийхдээ "Их тойруу, бага тойруу буюу хотын А зэрэглэлийн бүсэд байршилтай сургуулиудын цагийн хуваарийг зохицуулж болох юм хэмээн НБГ-аас тодорхойлсон ч одоогоор ямар нэгэн өөрчлөх шийдвэр гаргаагүй байна. Гэхдээ аль болох сурагчдын нас бие, сэтгэхүйн онцлогт тохируулан, шинжлэх ухааны үндэслэл дээр тулгуурлан шийдвэр гаргах ёстойг бид зөвлөж байгаа юм" гэв.

Нийслэлийн боловсролын газраас Баянзүрх, Чингэлтэй, Хан-Уул, Сүхбаатар гэсэн дөрвөн дүүргийн 59 сургуулийн цагийн хуваарьт өөрчлөлт оруулах саналаа гаргаад байгаа юм байна. Уг 59 сургуулийн тухайд өглөө 08:00 цагаас хичээллэнэ. Харин энэ сарын 21-нээс  цагийн хуваарьт өөрчлөлт оруулж, 07:45, 08:15, 09:00 гэсэн цагаар хичээллэхээр төлөвлөснийг Нийслэлийн боловсролын газраас мэдээллээ.

Иймд түгжрэлийг бууруулах зорилготой хичээлийг 30 минутын зөрүүтэй эхлүүлснээр замын ачаалал 12.5 хувиар буурна гэж Нийслэлийн боловсролын газраас тооцжээ.