Ч.Лодойсамбуу, Ж.Баярмаа, С.Цэнгүүн нарыг АН-аас ХАСАХГҮЙ

2025-05-22 15:40:00

Ерөнхий сайдын хүү О.Тэмүүлэнгийн найз охиндоо хэдэн арван сая төгрөгөөр цүнх, хувцас авч өгч, төрсөн өдрөөр нь 20 сая төгрөг бэлэглэсэн гэх асуудал олон нийтийн шүүмжлэлийг дагуулсан. Тиймээс иргэдийн зүгээс Ерөнхий сайд болон түүний хүү О.Тэмүүлэн нарыг орлогоо нотол, мөн Ерөнхий сайд Л.Оюун-Эрдэнийг огцор хэмээн Төв талбайд жагсаал зохион байгуулсан. 

Уг жагсаалд УИХ дахь АН-ын гишүүн Ч.Лодойсамбуу, Ж.Баярмаа, С.Цэнгүүн нар нэгдэж гарын үсгээ зурсан. Харин өчигдөр МАН-ын Бага хурал хуралдаж, АН-ын гишүүд гэрээгээ зөрчсөн тул Хамтарсан ЗГ-аас АН-ын хасаж байна хэмээн мэдээлсэн. 

Тэгвэл зарим хэвлэлээр УИХ-ын гишүүн Ч.Лодойсамбуу, Ж.Баярмаа, С.Цэнгүүн нарыг намаас хөөхөөр болсон гэх мэдээлэл цацагджээ. 

Энэ талаар намын дарга Л.Гантөмөрөөс тодруулахад "Гурван гишүүнийг намын бүртгэлээс хасна гэж яриагүй. Жижиг сажиг асуудлаас болоод намын гишүүдээ хөөнө гэж байхгүй. Харин сонгуулийн үеэр МАН-ын талд үйлчилсэн хүмүүстэй хариуцлага ярина" гэсэн юм.