Монголын нэг өдөр 

2025-10-29 13:33:00

МАН эрх мэдлийн тэмцэл улс орныг тавгүй, үймсэн байдалд оруулаад хэдэн сар өнгөрөв. Дээдэс нь суудлаа олохгүй болохоор доодос нь хөлөө олохгүй самуурч байгааг бодолцоод эртхэн эв зүйгээ олохсон доо. 

Эв зүйг нь олуулах гээд нам дотор үүссэн хурцадмал асуудлыг хоёр хоногт шийдвэрлэх хүрээнд ажлын хэсэг байгуулжээ. Уг ажлын хэсгийг УИХ-ын гишүүн асан, Эдийн засаг хөгжлийн сайд асан Ч.Хүрэлбаатар ахалж байна.  Бүрэлдэхүүнд нь  МАН-ын дарга асан, Ерөнхий сайд асан С.Баяр, Б.Даш-Ёндон, Монгол Улсын Ерөнхийлөгч асан Н.Энхбаяр, УИХ-ын дарга асан М.Энхболд, Ерөнхий сайд асан Ж.Эрдэнэбат, Л.Оюун-Эрдэнэ, Хууль зүй дотоод хэргийн сайд асан Ц.Нямдорж, УИХ-ын гишүүн, Эдийн засаг хөгжлийн сайд Н.Учрал, УИХ-ын гишүүн С.Амарсайхан, УИХ-ын гишүүн З.Мэндсайхан, Ж.Бат-Эрдэнэ, Ж.Батжаргал, Улаанбаатар хотын захирагч Х.Нямбаатар, "Эрдэнэс критикал минералс" ТӨҮГ-ын захирал.Д.Тогтохсүрэн,  МАН-ын Нарийн бичгийн дарга П.Энхбаатар нар багтжээ. 

Гэтэл энэ эвлүүлэрүүлэх хүмүүс нь харин ч яг хоёр талд тэнцүү хүч хувааж өгсөн мэт л харагдаж байна. 

Өнөөдрийн Засгийн газрын хуралдаанаар ажлаасаа чөлөөлөгдөж байгаагаа дуулж хуралдаанаас хөөгдөж гарсан С.Амарсайхан улам өс зангидах биш үү. 

Ерөнхийлөгч асан Н.Энхбаяр М.Энхболд нар Занданшатарын ард асаалттай танк шиг байж өнгөрсөн намын даргын сунгааны үеэр юу хэлж ярьж явсныг санах биз ээ. Бүр ч хүч нэмэн хагаралдаж байх зуур багш нар нь ажил хаяж хүүхдүүд нь өдөржин дэлгэц ширтэн, эцэг эхчүүд хүүхдээ харах уу ажлаа хийх үү гэж хоёр талд жороолсон гудамд нь түгжирсэн шатахуун тасалдсан, эдгээрт бухимдсан Монголын нэг өдөр өнгөрч байна.