Гарал үүсэл тодорхойгүй, хугацаа нь дууссан, нунтаг цагаан өнгийн бодис ашиглаж байсан махны үйлдвэрийг хаана

2022-05-26 17:41:00

Нийслэлийн мэргэжлийн хяналтын газраас Эмээлт дэх мах бэлтгэлийн газарт хийсэн лабораторийн шинжилгээний талаар өнөөдөр мэдээлэл хийлээ.

Тодруулбал, Сонгинохайрхан дүүргийн 32 дугаар хороонд байрлах Эмээлтэд Хятадын хөрөнгө оруулалттай “Эм Ди Си Пи” ХХК-ийн  махны үйлдвэрт хяналт шалгалт хийхэд хятад бичигтэй нунтаг цагаан өнгийн бодис ашиглан мах бэлтгэж байсан нь тогтоогджээ.

Тухайн нунтагийн гарал үүсэл тодорхойгүй, хугацаа нь дууссан байсан агаад үйлдвэрт технологийн зааваргүйгээр хэрэглэж байсан байна. 

"Эм Ди Си Пи” ХХК-ийнмах боловсруулах үйлдвэрт илэрч буй зөрчил нь хүний эрүүл мэндэд шууд болон шууд бусаар хор хохирол учруулж болзошгүй тул Нийслэлийн прокурорын газарт тавдугаар сарын 19-ний өдөр “Үйл ажиллагааг нь зогсоох тухай” саналыг хүргүүлжээ.

Түүнчлэн тус компанийн махны шинжилгээнээс ходоод гэдэсний эмгэг судлалын өвчин үүсгэх бодис илэрсэн нь тогтоогджээ. Уг компанийн ажлын байрны дүгнэлтийг хүчингүй болгосон байна. Иймээс цаашид “Эм Ди Си Пи”  компани өөрийн нэрээр махны үйл ажиллагаа явуулах боломжгүй болжээ.