Ковидын үеийн судалгаагаар архинд донтох эмгэг 25 дахин ихэссэн байна

2022-09-13 15:45:00

2021 онд СЭМҮТ, АШУҮИС, Монголын Сэтгэцийн Эрүүл Мэндийн Нийгэмлэг ТББ-д монгол хүний сэтгэцийн эрүүл мэндэд үнэлэлт дүгнэлт хийх судалгааг хийсэн байна. Тус судалгаагаар цар тахлын үед үүрэг гүйцэтгэж байгаа албаныханд сэтгэл түгшилт, сульдал жирийн иргэдээс 5-6 хувиар  илүү байсан. Мөн иргэдийн 60 хувь нь сэтгэл түгшилттэй, 70 хувь нь сульдлын хам шинжтэй, 39 хувь нь сэтгэл гутралтай байна гэсэн дүн гарсан талаар мэдээлсэн юм. 

СЭМҮТ-өөс зонхилон тохиолдох сэтгэцийн эмгэгийн тархалтын судалгааг 2019 онд хийсэн байна. Судалгаанд хамрагдсан хүмүүсийн 18.5 хувь нь сэтгэл түгшилт, 17.1 хувь нь органик бус нойргүйдэл, 16.2 хувь нь архаг ядаргаа, 11.7 хувь нь биеийн хэлбэрийн эмгэг, 6.2 хувь нь архинд донтох эмгэг, зургаан хувь нь сэтгэл гутралтай байна гэсэн дүн гарч байжээ.

1984-1992 онд хийсэн судалгааг өнөөдрийн судалгааг харьцуулахад стрессийн шалтгаант сэтгэцийн эмгэг 10 дахин, архинд донтох эмгэг 40 дахин нэмэгдсэн судалгааны дүн гарчээ.

Ковидын үеийн судалгаагаар архинд донтох эмгэг 25 дахин, сэтгэл гутрал 8 дахин, сэтгэл түгшилт 7 дахин ихэссэн тоо мэдээлэл байна. Ковид-19 халдварын үед өвчлөл буурч байгаа юм шиг харагдаж байгаа боловч ковидын дараах нөхцөл байдлаар амбулатори ачаалал ихссэн. Дээрээс нь архины хэрэглээтэй холбоотой, стресстэй холбоотой эмгэгүүд, хэвтэлтүүд нэмэгдсэн гэж албаныхан мэдээллээ.