И.Мөнхжаргал: Төсвийн асуудал дээр МАН-аас ирүүлсэн ажлын хэсэгт орохгүй

2022-10-25 15:19:00

Ардчилсан намаас цаг үеийн асуудлаар мэдээлэл хийлээ. 

Энэ үеэр АН-ын ерөнхий нарийн бичгийн дарга И.Мөнхжаргал "Монгол Улс анх удаагаа хамгийн их дүнтэй буюу 20.5 тэрбум төгрөгийн төсвийг батлахаар УИХ-д өргөн мэдүүлсэн. Энэ нь асар их үргүй зардлыг бий болгоно. Аравдугаар сарын 18-ны өдөр МАН-аас АН-ын 2023 оны улсын төсвийн төсөлд хүргүүлсэн шаардлагын дагуу хамтран ажиллах ажлын хэсэг байгуулах санал ирсэн. Хамтран ажиллах санал тавьсанд баярлалаа. Гэхдээ МАН-ын тавьсан саналд үгүй гэж хариулъя. Бид ажлын хэсэгт орж ажиллахгүй" гэж мэдээлэв. 

МАН урхи тавихаа болих хэрэгтэй. 20.5 тэрбум төгрөгийн төсөв батлах гэж байгаа үрэлгэн зардалдаа АН-ыг татан оролцуулж хамтран ажилласан мэтээр дүр эсгэх гэж байгаа бол тийм зүйл байхгүй. Төсөвт хэлэх шүүмжлэл, санал дүгнэлтүүдээ УИХ дахь АН-ын бүлгээр хүргүүлэн гэдгээ албан ёсоор мэдэгдэж байна гэлээ. 

Түүнчлэн МАН-аас  2020 онд УИХ-ын сонгуульд сонгогдохдоо амласан мөрийн хөтөлбөрөө биелүүлэхийг шаардаж, инфляцад өртөж байгаа ахмад настан, хөдөлмөр эрхэлж буй иргэдийн орлогыг хамгаалах шаардлагыг дахин хүргүүллээ. 

Үүнээс гадна 2022 оны есдүгээр сарын 27-ны өдөр Монгол Улсын дээд шүүхийн шүүгч нар хуралдаж АН-ын даргыг итгэмжлэлгүйгээр төлөөлөх этгээдтэй холбоотой асуудлыг хэлэлцэн, дүгнэлт гаргасан. Уг дүгнэлтэд АН-ыг итгэмжлэлгүйгээр төлөөлөх С.Эрдэнийн хүсэлтэд татгалзсан хариуг ирүүлсэн. Энэхүү дээд шүүхийн хуралдаанаар С.Эрдэнийг АН-ын дарга биш гэдгийг нотолж, дахин бүртгэж авахгүй гэдгээ баталгаажуулсан байна. Өнөөдрийн байдлаар АН-ыг итгэмжлэлгүйгээр төлөөлөх хүн байхгүй гэдгийг мэдээлсэн юм.