ОХУ-ын 2787 иргэн Монголд байх хугацаагаа 30 хоногоор сунгажээ

2022-10-27 10:23:00

Монгол Улсад өнөөдрийн байдлаар 22 мянган гадаадын иргэн түр болон байнгын оршин суух зөвшөөрөлтэй. Эдгээрээс ОХУ-ын 5000 гаруй иргэн байгаа бөгөөд сүүлийн нэг сарын хугацаанд 2787 орос иргэн Монголд байх хугацаагаа 30 хоногоор сунгуулжээ. Гадаадын иргэн харьяатын газарт ОХУ-ын  иргэд оршин суух зөвшөөрлөө дахин сунгуулах хүсэлтийг олноор өгч байгаа юм байна. Гэвч хуулийн хүрээнд 90 хоногийн дараа оршин суух хүсэлтээ дахин нэг сараар сунгах боломжтой юм. 

Гадаадын иргэн, харьяатын газрын дарга Н.Ууганбаяр "Гадаадын иргэний эрх зүйн байдлын тухай хууль, Засгийн газрын тогтоолоор батлагдсан “Монгол Улсын виз олгох журам”-ын дагуу Монгол Улсад түр ирсэн болон иргэд харилцан зорчих нөхцөлийн талаар байгуулсан Монгол Улсын олон улсын гэрээний дагуу визгүй ирсэн гадаадын иргэний Монгол Улсад байх хугацааг нэг удаа 30 хүртэл хоногоор сунгах зохицуулалттай. Хугацаа дууссан тохиолдолд Монгол Улсын хилээр гарах, нутаг буцах ёстой. Гэвч ОХУ-д үүссэн нөхцөл байдалтай холбоотойгоор иргэд цаашид Монгол Улсад түр хугацаагаар оршин суух хүсэлтийг олноор ирүүлж байна" гэв.